عناصر الإخوان يدشنون هاشتاج بعنوان تعليمات عن "اعتصام المترو"..نصائح النشطاء: صورة السيسى فى شنطتك وتسلم الايادى رنتك.. لو حد سألك أنت "معتصم" قوله"لأ" أنا "معتز"..اوعى تسلم على حد لابس تيشيرت رابعة

دشن عدد من النشطاء على مواقع التواصل الاجتماعى "تويتر" هاشتاج بعنوان "نصائح اعتصام المترو"، ويأتى ذلك تزامنا مع دعوة أنصار جماعة الإخوان المسلمين المطالبة بالعصيان المدنى اليوم الأحد، عن طريق احتلال خطوط المترو، وخاصة الرئيسية منها، من أجل إحداث شلل تام فى المحطات وزيادة الازدحام والتكدس بين الركاب، حيث قام عدد من النشطاء بتوجيه مجموعه من النصائح للمعتصمين حتى يتفادوا المسألة القانونية وإمكانية القبض عليهم بتهمة تعطيل المواصلات العامة، وإحداث حالة من التكدس والزحام. 
وقال ناشط: "احتمال كبير تلاقى تجمعات لناس شبه الأولتراس وكأنهم رافضون للانقلاب "مصيدة" اوعى تنضم لأى حد منهم، وصورة الزعيم السيسى فى شنطتك، وتسلم الايادى رنتك، وجريدة الوطن فى إيدك".
وأضاف ناشط آخر: "للبنات لابسى الخمار والنقاب: غيرى المترو كذا مرة وما تقعديش لآخر الخط لتفادى ملاحظتك من قبل قوات الأمن، وانزل قبل المحطة الخيرة عشان فيه حاجة اسمها تخزين ممكن المترو ميقفش فى آخر محطة ويكمل لغاية مكان التخزين وهيبقى سهل الامن يعتقلك".
وطالب ناشط: "لو حسيت حد مراقبك اعمل أنك بتكلم صاحبك فى التليفون وقوله هستناك فى محطة كذا وانزل فيها فعلا، وامسح أى شىء فى الموبيل يدل على توجهك السياسى من صور أو فيديوهات ويفضل نزع كارت الميمورى أساسا ووضع نغمة عادية".
من جانبه قال ناشط آخر: "ممنوع تماما أنك تتكلم فى السياسة، ولو لقيت حد بيشتكى من الزحمة اعمل نفسك من بنها، ولو حد وقفك وسألك أنت جاى منين ورايح فين، اوعى تقوله ملكش دعوة، قوله طيارة هليكوبتر هى اللى رمتنى". 
وعلق ناشط قائلاً: متفتحش كلام ونقاشات عن الانقلاب وأنت راكب فى الوقت ده، ولو حد هتف ماترددش وراه، احتمال يكون أمن دولة".
وتابع ناشط: "تعامل مع أى حد تشوفه أنه مخبر، حتى لو جه جمبك يحكيلك قصيدة غزل فى مرسى وهجاء للسيسى، وخد معاك قصة يعقوبيان ولما تخلص مهمتك وتبقى فى الأمان ارميها، ولو حد قالك أنت "معتصم" قوله لأ.. أنا "معتز".
وأضافت ناشطة: "اوعى تلاقى حد لابس تيشيرت رابعة وتروح تسلم عليه... ده أمن يا ذكى، ويا ريت يكون معاك تذكرتين ذهاب وعودة، علشان فى أخبار أنهم هيعتقلوا عدد كبير من اللى مش هيكون معاهم تذكرة وهما راجعين".
وعلى جانب آخر أوضح ناشط: "لو مربى دقنك بلاش تروح حتى لو مش مشارك وبتركب المترو فى العادى عشان هتبقى صيد سهل، ولو حسيت أنك هتتقفش، استرجل وشد فرامل الخطر وعطل كل خطوط المترو وانزل وكل المعتصمين اللى موجودين هيتدخلوا ويطفشوك". 

المصدر اليوم السابع