أشهر أسئلة البنات للعريس عشان تعرف لو "ابن امه"

المصدر : "اليوم السابع"

فى "قعدة التعارف".. 

مشاعر مضطربة و أفكار مرتبكة، وأحاديث داخلية تسيطر عليها الاحتمالات هذه هى الأجواء التى تسيطر على المقابلة الأولى فى زيجات الصالونات أو ما تسمى بـ "قعدة التعارف". وتوجد العديد من الفتيات اللاتى تظل لفترات طويلة تفكر فى طريقة لاستنباط صفات العريس فى أول جلسة، وتفكر فى الأسئلة التى ستساعدها فى ذلك. وشارك "اليوم السابع" الفتيات فى أفكارهن وسألهن "هتسألى العريس على ايه فى أول قعدة"؟ وقالت ندى محمد 23 سنة "البنت بتبقى محتاجة تعرف حاجات كتير أووى عن العريس وكلها فى أول قعدة، وانا شخصياً يهمنى اعرف إذا كان ابن أمه ولا لأ، وهعد كام مرة جاب سيرة مامته فى الكلام وفى أى سياق وكل شوية يقول أصل ماما قالت هعرف بقى". بينما قالت ياسمين مصطفى 28 سنة "أول قعدة دى بيتحدد عليها كل حاجة، وأنا لما قعدتها قبل كدة سألت العريس، لو اختلفنا انا ومامتك على حاجة واحنا بنشترى الجهاز والعفش، هتنفذ رغبة مين، ورد قاللى هراضيكى بس مقدرش أزعلها عرفت على طول إنه ابن أمه". وقالت نسرين محسن 29 سنة "أنا بهتم اوى بفكرة الكرامة وإنى أخد شخص يحافظ على كرامتى و أول سؤال ممكن أسأله هو لو ماماتك ضايقتنى و أنت مش موجود وشدينا مع بعض هتعمل ايه، وايه الحاجات اللى منتظرها من مراتك بعد الجواز". بينما قالت رشا أحمد 27 سنة "الإجابات مش شرط تكون على أسئلة، ممكن تبقى فى أسئلة فى دماغى و أعرف إجابتها من سياق الكلام، يعنى لو العريس فضل طول القعدة يكلمنى عن وجود أمه فى حياتنا هيبقى شكله ايه، أو طلب منى إننا هناكل عندها كلي يوم، أو إنى أروح أعملها الشقة، فى الوقت ده مش هحتاج أسئلة لأن الإجابات هتبقى واضحة". وقالت فاطمة حسن 26 سنة "القعدات اللى زى دى المفروض يعملولها نماذج أسئلة عشان نساعد البنات، وانا شخصياً لما مريت بالتجربة دى سألت العريس مين اللى دايماً بياخد معاك قرارتك ، وبتسمع رأيه، ولما قاللى مقدرش أعمل حاجة غير برأى ماما اتاكدت إنه ابن أمه".